最近睇到一張以前讀小六時代既相，不過張相其實好矇，連係咩活動都冇咩印象....令我諗返起一啲細個個陣既野，即時攞返以前既相薄黎睇～～
其實我細個啲相都唔係好多，BB相都好似得個三張～小學就多返少少，又有少少幼稚園啲相～～有啲相睇返覺得都幾爆笑架～～分享下啦等我～～
第一張出場既係～～
我同表妹既合照～～哈哈，其實我記得同表妹影過好多相，但唔知點解我得個幾張...應該又係唔見晒，或者係我表妹度，得閒問佢攞黎睇下先～～
嗱～我表妹BB個陣好得意，我成日帶佢走圍去，呢張就係抱佢上去俾佢望下街景啦，佢係好鍾意咁既，就算係佢自己屋企，佢都係咁捉住個窗框咁望街....因為佢仲未自己行到～～講起佢有好多搞笑相，有機會又可以分享下，啊表妹如果睇到呢度可能好想打死我～哈哈，個時細個我係單眼皮其實，唔記得到中幾開始先變左雙眼皮～～
呢張係中一個時，同朋友上去樂華村既山上面影既～～～個時覺得好開心好好玩€～～但其實條褲好搞笑，我自己望到都笑左～件衫亦好明顯完全唔啱我著我竟然咁著出街，仲去到咁遠...(個時黎講都幾遠架)
呢張都係中一，個時我係佛教徒黎既，啱啱天壇大佛起左冇耐，學校搞參觀，我又去左～～～仲有靚仔啊sir同我地一齊影～～
呢張係中秋節個時同婆婆影既，其實係樓下架咋...不過我婆婆已經過左身都有一段時間，呢張應該係過身前二年幾影既...
呢張相其實我都係收到冇幾耐，係一位小學同學send俾我既，唔係佢我都冇呢張相～～呢張...應該係小六.....
呢張係小六個時去宿營影既，因為我已經沖好晒涼準備訓覺，所以個頭成個乞衣咁，唔知做乜係呢個情況下我會俾人影相～～呢個camp我只係搵到兩張相....
另一張就係走之前影既～
又睇下啲再細個啲既相～～～
我冇記錯....呢度應該係樂富，我記得係嗰個時間，我媽咪勁鍾意去樂富行街，佢又會帶埋我同細路去既～～～呢張相係佢偷影我既，睇下我玩得幾投入～～
睇完上面一啲比較正經既童年相之後，有啲我個人認為幾搞笑既相都想放上黎～～～有啲都幾得意架～～
呢張係我既BB相，其實我都冇咩BB相....呢一張就真係BB冇牙既相，但媽咪話我三個月就食飯，所以搞到我有胃病～～你諗下個BB冇咩牙要扭計走去食飯其實都幾搞笑～～
個人黎講，我覺得呢張都幾爆笑，估下邊個係我？(其實好易估)
無錯！就係最右手邊嗰個，我覺得我個頭成個薯仔咁，都幾慘，女仔之家啊媽同我剪個咁既頭， 勁核突～～～我覺得我應該有喊過～～～
哈哈，我覺得呢張相好搞笑，都唔知係邊度影既，不過睇個高度，我應該係有人抱住我黎影既～～～我覺得我個陣都幾好笑容丫，我有少少印象我影過呢一種相，但唔知係咪呢幅啦，我記得曾經有個人同我去個木板個度 (我係意識唔度前面有圖畫，即係只見到一塊乜色都冇既版)，跟住有個圓形，嗰個人叫我伸個頭過去，我完全唔知做乜事，即係個時細個好蠢架嘛，唔知出面啲圖畫係可以match返我個樣咁影一幅相，我記得我想問係度做乜野，但又唔識問，淨係好聽話咁將塊臉咁放落個木版個洞個度，我好記得呢個情影～～真係有可能係呢幅相～～哈哈～～
呢張相...爆笑的...是我爸爸的頭髮....哈哈～～～
呢張相係以前住七層高既屋企個度影既，我記得啊媽係度影相，我特登攞住啲功課，扮乖咁俾佢影既...其實...邊有人咁企係度做功課架....一睇就知扮啦～～不過我都想講下我著住個條裙，個時我好鍾意呢條裙，仲成日著，係屋企都著住呢條裙，個啲係絲既質地，都幾閃幾靚架～～
嗯...其實我仲有啲細個相不過搵唔到～～但睇返細個啲相個陣，覺得自己細個唔係幾得意個啲，相反我兩個細路細個好得意，影相好多表情，有機會又再分享下~~
